Plantun de Prouvènço

Pèr coumpara dos planto d'encò nostre

Dactylorhiza sambucina & Aegilops cylindrica

Dactylorhiza sambucina

Orchidaceae

Noms en français : Orchis à odeur de sureau, Orchis sureau.

Descripcioun :
Aquesto maneto qu'a un pau l'óudour dóu sambu, trachis dins li pelouso, prado e bos clar de mountagno. N'i'a dos meno, uno di flour jauno picoutado, coume aquelo presentado à man gaucho, e uno di flour roujo-pourpro, mens coumuno (à man drecho). Se recounèis peréu à si làrgi fueio pas tacado que soun quàsi tóuti à la baso.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 30 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Dactylorhiza
Famiho : Orchidaceae

Ordre : Aspargales

Coulour de la flour : Jauno
Petalo : irreguliero
Ø (o loungour) flour : 17 à 20 mm
Flourido : Printèms - Estiéu

Sòu : Ca
Autour basso e auto : 300 à 2400 m
Aparado : Noun
Mai à juliet

Liò : Pelouso - Prado umido - Bos clar
Estànci : Subremediterran à Subaupen
Couroulougi : Éuropenco
Ref. sc. : Dactylorhiza sambucina (L.) Soó, 1962

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.